Ereñotzun ohikoa bilakatu den ekintza bat izango da bueltan, gaur arratsaldean: gaztain jatea egingo dute frontoian, 17:30etatik aurrera. Baina gehiago ere izango du ospakizunak, plan borobila prestatu baitu Olak Auzo Elkarteak, arratsalderako. Horrela, auzoko sagardo dastaketa egingo dute, eta bolatoki portatila ere jarriko dute frontoian bertan, nahi duten guztiek bola probatu dezaten.
Gainera, ez du hutsik egingo patata tortilla txapelketak ere. Edonork hartu dezake parte, bakoitzak bere patata tortilla eginda; eta frontoian entregatu behar dira, arratsaldeko 18:00ak baino lehen.