2019an jokatu zen Ereñotzuko Mendi Lasterketa azkenekoz, eta ordutik, bi urteko etenaldia izan du, pandemiaren eraginez. Baina, dena ondobidean, bueltan izango da lasterketa, aurten: maiatzaren 15ean jokatuko da, igandearekin, goizeko 10:00etan hasita, frontoitik. Edizio borobila izango da, gainera: 10garrena.
Aurrerago jakinaraziko dituzte lasterketaren xehetasunak; eta litekeena da, Covid-19aren harira neurri bereziak hartu behar izatea, unean uneko egoeraren arabera. Lasterketari buruzko informazio eguneratua, emango dute lasterketaren Facebookeko orrialdean edota webgunean (erenotzukomendilasterketa.wordpress.com).
Baina ibilbidea, behintzat, aurreko edizioetako berbera izango da, Axeriak Mendi Lasterketa Taldeak jakinarazi duenez. Guztira, 11,75 kilometroko ibilbide gorabeheratsua osatu beharko dute korrikalariek, 835 metroko desnibel positiboarekin. Ereñotzuko plazatik abiatu, eta Txilibita baserri historikoaren ondotik igoko dira korrikalariak, aldapa gogorretik, Larre Gain sagardotegira zuzenean. Bertatik, Arrondoko antenara igo, eta gainez gaineko bideari ekingo diote, Aiako Harria Parke Naturalean barrena, Urdaburuko tontorreraino. Eta lasterketaren azkeneko kilometroak osatzeko, jaitsiera azkar batek eramango ditu korrikalariak Ereñotzuko plazan bertan egongo den helmugara.