Urumea bailarako ondarearen inguruan, herri mugimendua sortu nahi dute Ereñotzun

Bailarako ondarea izango luke oinarri, sortu nahi duten herri mugimenduak.

Asmoaren aurkezpena egingo du Olak Auzo Elkarteak, larunbatean 11:00etan. Bertan parte hartzeko, izena eman behar da aldez aurretik.

Ereñotzuko eta Urumea bailarako identitate eta ondare gaien inguruan, «herritarrak aktibatu» nahian dabil Olak Auzo Elkartea; eta horretarako, herri mugimendua sortu nahi du.

Hori horrela, asmoaren berri emateko hitzordua jarri du larunbat honetarako, Ereñotzun bertan: frontoian edo Auzo Udaleko aretoan egingo dute aurkezpena, goizeko 11:00etan.

Auzotar guztiei luzatu diete gonbitea, aurkezpen saiora azal­tzeko; baina egungo egoera dela eta, aldez aurretik eman beharko da izena. Horretarako, mezua bidali behar da Olak Auzo El­kartearen telefono mugikorrera (688 780 356), norberaren izen-abi­zenak zehaztuta.

 

Azkenaldian sortu diren zenbait mugimendutan, oinarria

Auzo Elkarteak azaldu duenez, asmoaren oinarria dira «azkenaldian bailaran ondare ezberdinen inguruan sortu diren zenbait mugimendu». Eta helburua da, horietatik abiatuta sortzea «dinamika sendoago bat». Izan ere, ondareak «herri garapenean duen balioa» aintzat hartuta, «ondarea zaintzea, berreskuratzea eta, kasu batzuetan, berrerabilera aukera berriak lantzea» izango luke helburu, sortu nahi den herri mugimenduak.

Horren inguruko hausnarketa, sei galderatan laburbildu dute, aurkezpen saiorako deialdiarekin batera: Zer geneukan? Zer daukagu? Zer eduki nahi du­gu? Zertarako geneukan? Zertarako daukagu? Zertarako eduki nahi dugu?

Asmoari buruzko azalpen gehiago, aurkezpen saioan jasoko dituzte, interesa dutenek.

Kronika egunero, euskaraz eta doan jasotzen segi ahal izateko, Kronikalari gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez Kronikalari!