Gabonen atarian, familian gozatzeko moduko emanaldi bat antolatu du Olak Auzo Elkarteak, igande honetarako: Bidaibizitzen ikuskizuna eskainiko du Zirkun Zirko konpainiak, eguerdiko 12:00etan hasita, frontoian.
Txotxongilo, antzerki eta zirku ikuskizuna izango da: «Zer gertatuko litzateke, gure irudimen eta ametsen mundura aske bidaiatuko bagenu?». Galdera horri erantzuten saiatuko dira emanaldian zehar. Izan ere, bidaia liluragarri bat hasiko dute bi protagonistek, Zirkunek eta Tina txotxongiloak, bizikleta magiko bezain bitxi batekin.
'Ibaia ez da toki bat', 15ean
Datorren asteazkenerako ere jarri du hitzordua, Olak Auzo Elkarteak: Ibaia ez da toki bat ikus-entzunezkoa eskainiko dute, 19:30etan Auzo udaleko aretoan; eta solasaldia izango da ondoren, Nagore Legarreta eta Beñat Iturrioz egileekin. Bertan egoteko, izena eman behar da aldez aurretik: 688 780 356.