Larunbat arratsaldeko giro petralak ez zuen hoztu, Ereñotzun ospatzekoa zen Atsolorra. Giro goxoarekin egin zieten ongietorria, 2019an eta 2020an auzoan jaiotako haurrei. Bi urtetakoa tokatu da oraingoan, pandemiak ez zuelako aukerarik eman 2020an egiteko. Eta aurten ohi baino beranduago izan bada ere, behar bezalako Atsolorra egin diete auzoko txikienei.
Bertsoak eta musikak girotu zuten ospakizuna, eta urteroko meriendaren partez, txokolate beroa eskaini zieten bertaratuei. Ospakizunaren ondoren, gainera, segida izan zuen hitzordu bereziak, frontoian: Atsolorrari buruzko dokumentala eskaini zuten bertan, Ruben Rosasek 2018an grabatu zuena.