Musikak hartuko du Ereñotzuko frontoia, gaur arratsaldean, kontzertu berezi batekin: Hernaniko Musika Banda eta Hernani musika eskolako txistu taldea ariko dira bertan; eta haiekin batera, baita Iñaki Gurruchaga flauta bakarlaria ere. 19:00etan jarri dute hitzordua.
Bederatzi piezako kontzertua prestatu dute, guztira. Horietatik lau eskainiko ditu Hernaniko Musika Bandak, Jorge Pachecoren gidaritzapean: Tercio de Quites (Rafael Talens), Ross Roy (Jacob de Haan), Santana a Portrait (Giancarlo Gazzani) eta Deep Purple Medley (Toshihiko Sahashi). Musika eskolako txistu taldeak, berriz, hiru pieza joko ditu: Rapsodia Vasca (Vicente Beobide), Deva (Pablo Sorozabal) eta Mendirik Mendi (Jose Antonio Erauskin). Eta Iñaki Gurruchagak, bere aldetik, bi pieza eskainiko ditu bakarlari gisa: Las aventuras de Tiny Bird (David Rivas), eta Figuration for Shakuhachi and Band (Tetsunosuke Kushida).