Ereñotzuko frontoian bihar, 22:00etatik aurrera, Esku Harriak: Oteizaren (h)aria ikuskizuna eskainiko da. MugMus Laborategiaren lan honetan: mugimenduaren (dantza), musikaren, eskulturaren, bertsolariaren, hotsen, espazioaren trataeraren, hitzen… harilkatze fin baten bitartez, ikusle-entzulea Jorge Oteiza artista polifazetikoak bere ibilbide aberatsean jorratutako iruditeri anitzaren berrirakurketa propio batean murgilaraziko da.
Horrela, aipatutako elementu guztien elkargune metaforikoaren bitartez ondoko gai hauek jorratuko ditu: mairu-baratzeak, hutsa, espazioaren erabilera sakon eta moldagarria, nagikeria, eskultura Laboratorio de Tizas bilduma, musika seriala eta zehatza, bertsolaria, txalaparta, Ez Dok Hamairu, hitza, haurra... Oteizaren unibertso zabala eta partikularra eraikitzeko.
Aforoa mugatua izango da eta horregatik izenemateko 688 780 356 telefonora deitu behar da edo idatzi telefono horretara WhatsApp bidez. Olak auzo elkarteak antolatu du ikuskizuna, Auzo Udalarekin batera.
Esne Beltza+Amak-en kontzertua uztailaren 23an
Bestalde, uztailaren 23 ostiralean, Esne Beltzak+Amak taldeen arteko kolaborazioaren kontzertua izango da Ereñotzuko frontoian. Kasu honetan sarrerak 10 euro balio ditu, eta gaurtik aurrera daude sarrerak salgai Auzo Udalean eta online egongo dira eskuragarri Bibe.me webgunean.
Esne Beltza eta Amak taldekoak dira Xabi eta Kristiñe Solano anai-arreba ereñotzuarrak. Duela hiru aste bi taldeek plazaratu dituzte Sortzen eta Nafar Erreinua abestiak elkarrekin eta Ereñotzun entzungo dira beste hainbat abestirekin batera.