Purita Santa Cruz ereñotzuarrak 100 urte bete ditu eta ederki asko ospatu zuen urtebetetzea, Oreretako Sanmarkosene adinekoen egoitzan. Lore-sorta eta guzti, duela mende bat jaio zela ospatu zuen Puritak, egoitzako gainerako egoiliar eta langileekin. Txistu doinuek eta bertako lagunen kantuek alaitu zioten eguna ereñotzuarrari, txistulari eta guzti ospatu baitzuen urtebetetzea. Egoitzaren kanpoaldean egin zuten errezitaldia musikariek eta egun borobila izan zen Puritarentzat.
Ereñotzun jaioa da Purita, eta bertan egin zituen haurtzaroko eta gaztaroko urteak. Gero, 35 urte zituela, Lezora joan zen bizitzera, baserriko lanekin gogaituta. Bertako Bodega tabernan egin zuen lana, Lezon ezagutu zuen senarra eta semea ere Lezon jaio zen.
Zorionak eta urte askotarako, Purita!