Garai zailak alaitzeko asmotan da Olak auzo elkartea, eta horri begira, emanaldi berezia antolatu du gaur gauerako: Auskalo zeinek jarriak saioa eskainiko dute Eñaut eta Unai Agirre bertsolariek eta Imanol Kamio musikariak, 22:00etan hasita.
Ereñotzuko frontoian izango da, eta emanaldirako sarrerak badaude oraindik, Irrintzi tabernan; atzo arratsaldean, 40 bat sarrera geratzen ziren. 5 euroan daude salgai.
Ez da ohiko bertso saioa, bertan eskainiko dutena. Izan ere, bertso jarri musikatuen emanaldia prestatu dute: musikari errimak jarriko dizkiote Agirre anaiek, eta bertsoei melodiak Imanol Kamiok. Emanaldirako, bertso zahar historikoak berreskuratu dituzte Eñaut eta Unai Agirrek, eta bertso berriekin batera eskainiko dituzte, musikaren laguntzaz.
Horrekin, «bertso jarriari bere lekua» eman nahi izan diote bi bertsolariek, gaur egun bat-batekoak duen protagonismoaren aurrean. Modu informalean hasi ziren emanaldia eskaintzen, duela urte pare bat, eta iazko maiatzean egin zuten aurreneko saio formala, Beasainen. Ordutik, gehiago ere eskaini dituzte, baita Hernanin ere, joan den abenduan Biterin, Bertsolataren barruan. Ereñotzura ekarriko dute gaur, baina ohi bezala, izango du berezitasunik, aurrekoen aldean...