Ostegun honetan izango du zita berri bat, Ereñotzuko Uda Kulturalak. Eta oraingoan, antzerkiari egingo diote tokia: Zoaz pake santuan antzezlana eskainiko du Txalo Produkzioak konpainiak, Ane Gabarain eta Mikel Laskurain aktoreen eskutik.
Arratsaldeko 19:30etan izango da hori, Ereñotzuko frontoian; eta antzezlanaz gozatu nahi duenak, izena eman beharko du aldez aurretik, orain arteko saioetarako bezala. Horretarako, 688 780 356 telefonora deitu behar da, edo WhatsAppez idatzi.
Senarra pozoitzeko saiakera baten kronika aldrebesa
«Lehertzeko moduko komedia» eskainiko dute, Gabarainek eta Laskurainek. Bikote bat irudikatuko dute, baina ez bikote zoriontsu bat: daramakiten bizimodu aspergarriarekin amaitzeko asmoz, gizona pozoitzea erabaki du emakumeak. Eta hori are eta gordinagoa egiteko, bere asmoa aitortuko dio gizonari, eta prest dago haren azkeneko orduak etxe batean giltzapetuta pasatzeko, berarekin. Aurreikusitako plana, ordea, hankaz gora jarriko zaio emakumeari.
Antzezlan barregarria izango da, etengabeko ustekabez betetakoa. Akatsez eta ahuleziaz betetako bi pertsonaia izango dira taula gainean, «baina aldi berean, maitagarriak eta dibertigarriak», aurreratu dute.
Emmanuel Robert-Espalieuren obra da Ereñotzura ekarriko dutena, eta Begoña Bilbao da antzezlanaren zuzendaria.