Demode Quartet laukotearen musika eta umoretik, marrazki bizidunetara egingo du salto, Ereñotzuko Udazken Kulturalak; eta zehazki, atzera saltoa izango da: 1965eko New Yorkera.
Black is Beltza pelikula jarriko dute datorren ostiralean, azaroaren 29an, gaueko 22:00etan ludotekan. Fermin Muguruzaren filma da, helduentzako animaziokoa; eta kontatzen du, 1965eko urrian Iruñako erraldoien konpartsa gonbidatu zutela, New Yorkeko desfilean parte hartzera. Ez zuten, ordea, denek parte hartu: arrazagatiko bereizkeria tarteko, hango agintariek debekatu egin dute erraldoi beltzen partehartzea.
80 minutuko iraupena dauka, eta Muguruzak, Harkaitz Canok eta Eduard Solak idatzi dute gidoia. Protagonistei ahotsa, berriz, hainbat aktorek jarri diete: Unax Ugalde, Iseo, Isaach de Bankolé, Sergi Lopez, María de Medeiros, Emma Suárez...