Udazken kulturalaz gozatzen jarraitzen dute ereñotzuarrek, eta aurreko larunbatean Lizarran izan baziren adinekoak, Zumaiara joango dira auzotarrak gaur, Flyschera bisita egitera. Goizeko 09:15etan abiatuko dira autobusean, eta Zumaian bertan bazkalduko dute.
Lizarrara, 15 laguneko taldea joan zen, arduradunarekin batera, eta martxa ederrean pasa zuten eguna: Iratxen hamaiketakoa, kontserbera bisitatu, Lizarran paseatu, eta Iratxera buelta: bazkaria, bingoa eta dantzaldia izan zuten bertan!
Ogi tailerrean, izenematea
Azaroaren 8an eta 9an izango da hurrengo zita: ogi tailerra, Eguzkileire okindegiaren eskutik. Lau saiotan egingo dute: ogi ekologikoa nola egin ikasteko bi tailer Ur-Mia elkartean, ostiralean 17:00etan eta larunbatean 08:00etan; bideo emanaldia ludotekan, ostiralean 19:30etan; eta ogi dastaketa eta bazkaria, bigarren tailerraren ondoren. Izena eman behar da aurrez, Auzo Udalean, azaroaren 4ra arte. 15 euro dira.