Bi bilera ireki deitu ditu Astigarragako Udalak, datozen asteetarako. Astelehenean bertan izango da lehenengoa, eta abenduaren 14an bestea. Etzikoan, Udalak 2027an martxan jarriko duen herri barruko autobusaren inguruko xehetasunak azalduko dizkie herritarrei; eta abendukoan, herriko aparkalekuak izango dituzte hizpide. Udaletxeko pleno aretoan 18:30etan izango dira biak ala biak, eta Udalak herritar guztiak gonbidatu ditu bi bileretan parte hartzera.
Herri barruko autobusaren nondik norakoak, etzi
2027an jarriko da martxan herri barruko autobusa Astigarragan. Orain arte, auzoetan egindako bileretan eman dira zerbitzu berri honen aurreneko azalpenak. Beraz, bilera horietara bertaratutako auzotarrek baino ez dituzte azalpenak jaso. Horrela, etziko bilera irekian azalduko zaizkie herritar guztiei proiektuaren xehetasunak: ibilbidea, maiztasuna eta geltokiak, besteak beste.
Abenduaren 14an, aparkalekuen inguruko bilera irekia
Udalak bigarren bilera ireki bat ere programatu du, abenduaren 14an, hori ere astelehenez. Adierazi duenez, aparkalekuen egoera zein den jakiteko azterketa bat egin zuen, eta dagoeneko emaitzak jaso ditu. Horrela, bigarren bilera ireki honetan, herritarrei azalduko zaizkie azterketaren ondorioak. Gainera, herritarren ekarpenak jasotzeko tartea ere izango da, «herriko aparkalekuen arazoari aurre egiteko eman daitezkeen urratsak elkarrekin aztertzeko».