Erantzun ozena eman zion Astigarragak herenegun, asteburuan gertatutako eraso arrazistari. Irain eta mezu arrazistak zituzten pintadak agertu ziren herriko komertzio batean, eta hori salatzeko, kontzentrazioa egin zuten astigartarrek astelehen arratsaldean, Joseba Barandiaran plazan. Makina bat herritar azaldu ziren bertara, adierazteko ez dutela horrelako jarrerarik onartuko, eta elkartasuna adierazteko erasoa jasan duen komertzioko kideei.
Erasoa «irmo eta ozen» salatu du Udalak ere, udal talde guztiek aho batez onartutako adierazpen instituzionalean. Aldarrikatu du «elkarbizitzaren eta giza eskubideen aurkakoa» dela erasoa, eta bere babesa helarazi die establezimenduko familiari eta bertako langileei.