Egun osoko egitarau polit zein dibertigarria prestatu dute Sagardoetxeako kideek, Astigarragako Udalaren laguntzarekin, museoaren 20garren urteurrena behar bezala ospatzeko. 'Udazken Zaporez'en garaiarekin batera ospatuko dute beraz, urteurren berezi hau. Goiz zein arratsaldez izango dute zer egin astigartarrek eta inguruko herrietakoek, mota ezberdinetako jarduerak izango baitira Sagardoetxean, adin tarte guztietako jendearentzat aproposak.
Goizeko 11:00etatik 13:00etara, ate irekiekin eta bisita gidatuarekin batera, 'Biribilka' izango da, Idoia Lizeagaren eskutik egingo den arte instalazio partehartzailea. 16:00etatik 18:00etara familientzako jarduerak daude antolatuta. Lehenik eta behin, 'Sagardoetxeako lorategia familian' tailerra eskainiko da, Baratz elkartearen eskutik. Eta bigarrenik, 'Sagarretik sagarrera' oka jokoarekin primeran pasako dute bertaratzen direnek. Azkenik, arratsaldeko 18:00etan, kontzertuak hasiko dira sagastian; 3Zur eta Zerumuga talde astigartarrek jarriko dute giroa.