Ertzaintzak jakinarazi du 59 urteko gizon bat atxilotu zuela ostiral goizaldean Astigarragako kamioien parkinean, 50 urteko emazteari eraso fisikoa egitea eta tratu txarrak ematea egotzita. Azaldu duenez, gizona aurreko bost egunetan bi aldiz saiatu zen emakumea itotzen, eta objektu sendo batekin jo zuen. Torreviejakoa da bikotea, baina gizona garraiolaria dela eta, ohikoa zuten elkarrekin bidaiatzea.
Donostiako Unibertsitate Ospitaleko larrialdi zerbitzuetatik jaso zuen deia Ertzaintzak, «ohartaraziz emakume batek adierazi zuela senarrak tratu txarrak eman zizkiola, eraso fisikoak jasan zituela eta aipatutako gertakariekin bateragarriak diren lesioak zituela». Horrela, Ertzaintza berehala bertaratu zen biktimari laguntzera, eta ospitaleko alta jaso ondoren, ertzain-etxera eraman zuten, salaketa jartzeko.
Kamioiarekin elkarrekin bidaiatzen ari zirela, gizona abuztuaren 23an saiatu zen emakumea itotzen, kamioiaren kabinan bertan, baina haren oihuengatik eta inguruan jende gehiago zegoela ikusita, erasoa eten zuen. Biharamunean, ordea, gizonak objektu gogor batekin jo zuen emakumea gorputzeko hainbat ataletan, eta itotzen saiatu zen berriro. Hurrengo egunetan, gainera, mehatxu egin zion emakumeari, bien alabari eraso egingo ziola esanez.
Etxera bueltatzean gizonak mehatxua beteko ote zuen beldur, emakumeak oso gaixo zegoen itxurak egin zituen joan den ostegunean, Astigarragako aparkalekuan zeudela; eta gizonak bertako zaindari bati eskatu zion laguntza. Hark anbulantzia bat eskatu zuten, eta behin ospitalean, senarraren presentziarik gabe, emakumeak azken egunetako gertaerak kontatu zituen, eta adierazi zuen urteak zeramazkiela tratu txarrak jasaten.