Pelotari kalea itxiko dute bihar, ekainak 19ra arte, obren azkeneko asfaltatze eta pintaketa lanak burutzeko. Martxoan egin zuten lehen zatia, eta orain, kaleko obrarekin amaitzeko, Zubitxo frutadendatik Eroski pareraino doan eremua osatuko dute. Hori egin bezain pronto emango dira amaitutzat Pelotari kaleko bidegorri zatiaren obrak.
Bitartean, ibilgailuak Kale Nagusiko 16garren zenbakitik (Santio Zeharreko bidegurutzea) sartu beharko dira herriko erdigunera, eta kale horretako ohiko noranzkoaren aurka joan beharko dira. Horrela, Pelotariko bidegurutzeraino iritsi (Eroski parean) eta Kale Nagusitik jarraitzeko aukera izango da, Galtzaur kaletik irteteko. Bestalde, Donostia Ibilbidetik sartu ahal izango dira ibilgailuak, Lanberri kaletik gorantz joateko; eta kasu horretan ere, Galtzaurrera aterako dira.
12 aparkaleku berri, Bidebitarte poligonoaren sarreran
Udalak, azken urteetan herriko aparkaleku arazoak konpontzeko egindako ahaleginekin (Oialume bidean, Donostia ibilbidean eta Troia ibilbidean, besteak beste) jarraitzeko, eta Pelotariko bidegorriaren obrak aprobetxatuz, 12 aparkaleku berri ahalbidetu ditu Bidebitarte poligonoko sarreran.
Pelotarin, gainera, lortu da zeuden 81 aparkalekuei eustea. Horrekin batera, pasa den neguan pintaketa lanak egin ziren, Donostia ibilbidean 20 aparkaleku berri sortuz, Portutxotik gertu. Ondoren, ekin zitzaion Donostia ibilbidetik Bidebitarteko sarreran aparkaletu berriak egiteari, jada erabilgarri daudenak. Azkenik, Pelotariko obrengatik okupatuta dauden aparkalekuak ekainaren 15ean, astelehenean, egongo dira erabilgarri.