Ostiral arratsalderako egin zuen deialdia Astigarragako DBH Orain plataformak, eta makina bat herritarren erantzuna jaso: Herri Eskolako patioan elkartuta, argazki erraldoia atera zuten, kamixeta berdeak jantzita eta kolore bereko globoak eskuetan hartuta. Horrela, eskaera zuzena egin zioten Eusko Jaurlaritzako Hezkuntza Sailari: lehenbailehen has ditzala DBHko ikastetxea eraikitzeko obrak.
«Adierazi nahi izan dugu Astigarragako Bigarren Hezkuntzako institutua berandu hasiko dela, eta Eusko Jaurlaritzako Hezkuntza Sailari berriro eskatu diogu obren esleipena gehiago ez atzeratzeko. Eskerrak eman nahi dizkiegu elkarretaratzean parte hartu duten guztiei», adierazi zuten plataformatik.