Astigarragako herri barruko autobusa irailerako martxan egotea aurreikusten da. Horren harira, PSE-EEk Udalari eskatu dio egitasmoaren inguruko informazio «zehatzagoa eta anitzagoa» ematea, baita «Mugi sistemaren integrazioa bermatzea» ere.
PSEtik nabarmendu dute Gipuzkoa, herri arteko garraioaren erabilerari dagokionez, «historiako momenturik onena bizitzen ari dela», 31,2 milioi bidaia erregistratu baitziren 2025ean. Buruntzaldeari dagokionez, 7,2 bidaia egin ziren pasa den urtean, aurrekoarekiko %10eko igoera suposatzen duena. Horrela, BU13 (Hernani> Astigarraga> Donostia) izan da eskualdeko linearik erabiliena, 1,1 milioi aldiz zehazki.
Bestalde, Foru Aldundiko Gobernu kontseiluak martxoaren 3an Lurraldebuseko linea berria onartu zuen, Astigarraga ospitaleekin eta Donostiarekin konexioa hobetzeko. Biztanleriaren hazkundeari erantzuteko helburua zuten Aldundian.
Horrenbestez, Patxi Suarez bozeramaile sozialistak adierazi du «Foru Aldundia esku hartzen eta herrien arteko garraio zerbitzuak indartzen ari den bitartean, Astigarragako Udalak barne-mugikortasunarekiko egingo duen apustuaren nondik norakoak» ez dituztela ezagutzen.
Herri barruko autobusari dagokionez, Suarezen hitzetan, «ez dakigu ibilbidea, maiztasuna, zerbitzu eredua, kostua eta nola finantzatuko den». Udalak Gipuzkoako Garraoiaren Lurralde Agintaritzarekin tramiterik hasi duen Mugi sistema txertatzeko ere jakin nahi du PSEk.
Beraz, Astigarragako PSEk mozioa erregistratu du Udaletxean, «alkateak batzarrean azalpenak emateko».