35 urte baino gehiago daramazki Txirriskla txistulari taldeak, igandero-igandero, Astigarragako herria bere diana goxoarekin esnatzen. Eta oraingoan, ostiralez jarri du oso hitzordu berezia: 'Txirrisklaren dianak' izeneko dokumentala jarriko dute etzi, Erribera kulturguneko aretoan.
Iganderoko kale bueltak oinarri hartuta osatu dute ikusentzunezkoa, eta horren bitartez dianaren nondik norakoak ezagutzeko gonbitea luzatu diete herritarrei, etziko emanaldira bertaratuta. Iluntzeko 19:00etan hasiko da saioa, eta doakoa izango da sarrera.
«Azkeneko urte honetan ixilpean landu dugun proiektua plazaratzeko unea iritsi da, etzi eskainiko dugun emanaldian. Bertan, igandetako diana bat barrutik bizi ahal izango duzue, eta herriko txistu taldea hobeto ezagutu. Denak zaudete gonbidatuta, zain izango gaituzue!», adierazi dute Txirrisklatik.