Erribera kulturgunean jokatu ziren, 2025ko azken astean, Gipuzkoako Beteranoen zein Emakumeen Txapelketak. Astigarragako Xake Klubak antolatu zituen estreinakoz, Gipuzkoako Federazioarekin batera; eta goizez zein arratsaldez, emozioa eta lehia osasuntsua izan ziren nagusi.
Txapeletako bat etxean geratu zen, gainera. Izan ere, Astigarragako Xake Klubeko kide bat nagusitu zen beteranoen artean: Roberto Roldan. Zazpi kanporaketa gogor gainditu, eta 18 partehartzaileen artean onena izan zen bera. Josu Tornay arrasatearrarekin berdinduta bukatu zuen, baina desenpatea bere aldera erori zen.
Emakumezkoetan, Nenci Carolina Suescun Parra venezuelarrak lortu zuen garaipena, sei partehartzaileren artean.
Astigarragako Xake Klubak «oso balorazio positiboa» egin du antolatutako txapelketen inguruan: «Klub gisa, irudipena daukagu beste pauso bat eman dugula txapelketa garrantzitsu horiek Buruntzaldera ekarrita, eta indarra eman digu Kluben Ligari aurre egiteko». Gaur bertan hasiko da Kluben Liga, eta Astigarragako Xake Klubeko lau talde ariko dira lehian.