Ganix Urdangarinek eta Axier Luluagak ezin izan zuten Gipuzkoako txapela lortu Zestoako Gurutzeaga frontoian, gomazko paleta modalitateko lehenengo mailako finalean, pasa den larunbatean. 25-14 galdu zuten Oteiza taldeko Jokin Aizpuru eta Iker Epelde azkoitiarren aurka.
Txapelketako bi bikoterik onenak iritsi ziren finalera, baina azken partiduan azkoitiarrak jaun eta jabe izan ziren. Hasieratik amaiera bitarte gehiago izan ziren jokoan. Ganix Urdangarinek aurkarien nagusitasuna aitortu zuen. «Besteak gu baino gehiago izan ziren, ez dago besterik. Hala ere oso gustora geratu gara egindako txapelketarekin». Astigartarrek partidu bakarra galdu dute, finala. Eta aurkari oso gogorrak menderatu dituzte bidean.