Gaur, 12:30ean elkarretaratzea izango da udaletxearen aurrean; eta 19:00etan Emakumeon Etxeak deituta, elkarretaratzea eta ekintza, 19:00etan, Emakumeon plazan. Herritarrak deialdi hauekin bat egitera deitzen ditugu.
Azaroaren 25ean gogoratzen da mundu mailan Emakumeen aurkako indarkeria ezabatzeko nazioarteko eguna gisa eta argi dago indarkeria matxistak lehentasunezko arazoa izaten jarraitzen duela gure gizartean. Datuen arabera, bi emakumetik batek indarkeria matxista jasan du bere bizitzan zehar, eta sare sozialetako indarkeria-kasuak ugaritzen ari dira. Horrek islatzen ditu gure gizarte patriarkalean dirauten egiturazko desberdintasunak, botere-harremanak gizonen nagusitasunak markatzen baititu. Egun zehatza izateaz gain, azaroaren 25a ekintzarako deia da, emakumeen bizitza libre, seguru eta autonomoak eraikitzeko. Indarkeria matxistak ez dira urrutikoak, zoritxarrez. 2025ean, Astigarragako Gizarte Zerbitzuek indarkeria matxistaren, sexu-askatasunaren aurkako indarkeriaren eta horrekin lotutako 14 kasu berri artatu dituzte; beraz, esan daiteke joera aurreko urteetakoaren antzekoa dela. Aurten, 6 urruntze-agindu berri izan dira eta beste 17 daude indarrean aurreko urteetatik, guztira, 23 urruntze-agindu ditugu indarrean herrian.
Zifra hauekin, zalantzarik gabe, funtsezkoa da erakundeetatik borrokatzen jarraitzea, legeak berrituz eta indarkeria matxistaren aurkako politika eraginkorrak ezartzeko beharrezko baliabideak esleituz. Izan ere, Astigarraga erakundeen arteko protokolo bat prestatzen ari da, erakundeek elkarrekin ahaleginak koordinatzeko indarkeria matxistaren biktima diren emakume guztiei arreta integrala eta errespetuzkoa emateko orduan, berriro biktimizatzea saihestuz. Prebentzioa funtsezkoa da. Hori dela eta, Astigarragako Udalak proiektu bat jarri du abian gure herrian egiten diren hezkidetza-jardueren diagnostikoa egiteko, etorkizuneko Hezkidetza Plana abian jartzeko helburuarekin. Horrela, haurrak eta gazteak sentsibilizatzea lortuko dugu berdintasunaren, hezkidetzaren, errespetuaren, berdintasunezko tratuaren eta indarkeria matxisten prebentzioaren arloan, bai ikastetxean, bai herrian antolatzen diren kultura-, gizarte- eta kirol- jardueretan. Hori guztia, Astigarragako hezkuntza komunitatearekin eta arlo horretan funtsezkoak diren beste eragile batzuekin lankidetzan.
Azaroaren 25a dela eta, hainbat ekintza antolatu dira Astigarragan, herritar guztiak gonbidatuz. Joan den azaroaren 13an, Shaila Melcón López Sortzen-eko adituak hitzaldi bat eman zuen Emakumeen Etxean, indarkeria digitalei, manosferari eta gazteen artean sortzen ari diren indarkeria matxisten forma berri horiei aurre egiteko beharrezko tresnei buruz. Hain zuzen ere, Gaztelekuko gazteak duela hamar egun hasi ziren azaroaren 25ean jarriko duten pankarta diseinatzen. Joan den larunbatean, azaroak 22, Erribera kulturgunean "Astigarraga sevillanak dantzatzen genero indarkeriaren aurka" izeneko ikuskizuna eskaini
zen. Pasa den igandean, 8 eta 12 urte bitarteko berrogeita hamaika neska eta mutil inguruk "Berdintasunaren altxorraren bila" ihes-gelan parte hartu zuten Txomineneako frontoian. Azaroaren 25ean bi kontzentrazio daude programatuta. Goizean, elkartaratzea udaletxearen aurrean 12:30ean, eta, arratsaldean, Emakumeon Etxeak deituta elkarretaratzea eta ekintza, 19:00etan, Emakumeon plazan.