«Zaintzaren inguruan hausnarketa eragiteko eta herrian zaintza sare bat eratzeko» 'Elkar Zainduz' prozesua abiatu du Astigarragako Udalak. «Pertsonen bizi kalitatea hobetzeaz gain, arlo komunitarioa indartzea da asmoa, zaintzak erantzukizun partekatua izan behar duela agerian utzita», zehaztu dute.
«Zaintzaren krisi sakon batean» kokatu dute prozesua, «nabaria» delako zaintza beharrei erantzuteko «ezintasuna», eta arlo horretako ardura gehienak emakumezkoengan erortzen direlako. Berezia da Astigarragaren kasua; izan ere, biztanleriaren zahartzea eta jaiotza tasa altua elkartzen dituen herria da. Horregatik, prozesu honetan adin txikigoengan eta helduengan jarriko dute arreta.
Zaintza mahaia, martxan
Prozesuarekin zaintzaren bueltan dabiltzan eragileak artikulatu nahi ditu Udalak. Dagoeneko bilduta daude Astigarragaren diagnostikoa egiteko datuak, eta herriko hainbat ordezkarik osatutako zaintza mahaian baloratuko dituzte.
Parte hartzeko bi modu izango dituzte astigartarrek
'Elkar Zainduz' prozesuan parte hartzeko bi era izango dituzte Astigarragako bizilagunek. Lehenengo modua eraikin publikoetan topatuko duten galdetegi fisikoa erantzutea izango da, euren bizipenak, iritziak eta beharrak azalduz. Bigarren modua, berriz, bilera irekien bidezko ekarpena izango da; azaroaren 27an, otsailaren 5ean eta martxoaren 26an izango dira, Erriberan, arratsaldeko 17:30etan.