Ergobiko Jaiak ezagutzen ez dituena, harri eta zur geratuko da halako auzo txikiak hain programa zabala eta potentea osatzen duela ikusita. Eta ezingo du imajinatu, inondik inora, lau eguneko festa hain modu berezian bukatu dezaketenik. Tira, 'berezia' hitzaren ordez 'xelebrea' beharko luke aurreko esaldiak, ziurrenik...
Hiri eta herri nagusien estiloan, Ergobin su artifizialik ez da faltako aurten ere, astelehen gauean, 23:00etan hasita. Baina jaien agurrari saltsa jarriko diona, beste urte batez, auzotarren ikuskizun berezia izango da. Eta joan den urtean 'Ergobision' jaialdia eskaini ondoren, Ergobiko zirkua izango da bueltan aurten. Auzotarren 'trebeziaz' gozatu nahi duenak, izango du nahikoa aukera, 23:15etatik aurrera.
2014ko emanaldiaren argazkiak berreskuratu ditugu artxibotik, orduan ere eskaini baitzuen ikuskizuna Ergobiko zirkuak. Pailazoak, trapezistak, malabaristak, magoak, 'bala' gizonak... Denetik izan zen duela 11 urteko saio hartan, adin guztietako partehartzaileekin. Aurtengorako zer prestatu duten ezin jakin, baina bertaratuek ondo pasako dutela, hori ziurtatuta dago.
