Beroketa ederra ari da izaten aurtengoa, Santio Jaiei begirakoa. Ostiralean esku pelota izan bazen protagonista, atzo palista gaztetxoak zein helduak aritu ziren lehian, eta kirolak segida izango du gaurkoan.
Batetik, haurrentzako herri kirol jokoak izango direlako Kontxa Etxeberria plazan, goizeko 11:00etan hasita. 3-11 urte bitartekoentzat daude prestatuta.
Eta bestetik, bueltan izango delako Santiomendiko Igoera herrikoia, adin guztietako txirrindularientzat. Goizeko 11:30etan hasiko da proba, eta Joseba Barandiaran plazatik abiatuko dira ziklistak, majo sufritzeko borondatez. Gaztetxoak ariko dira aurrena, infantilak, kadeteak eta jubenilak; eta ibilbide laburragoa egingo dute haiek, Santiomendiko ermitara iritsi gabe. Ondoren, eguerdiko 12:00etatik aurrera, helduen txanda izango da, nork denborarik onena markatuko. Haiek ez dira libratuko igoeraren azkeneko aldapaz ere...
'Futbola kalean', bihar
Bihar arratsaldean izango da azkeneko jarduera, festetarako beroketaren barruan: 'Futbola kalean' saioa egingo dute kiroldegian, 5-11 urteko gaztetxoentzat, 17:00etan hasita.