'100 eta 100, 50!' Santio Jaietako preludio berezia egingo dute gaur Foru plazan

Herriko eragileen artean saretu, emanaldi bat prestatu eta Santio Jaien bezperan oholtzaratu. Horixe da '100 eta 100, 50!' preludioak jarraitu duen haria, antolakuntza lanak dakartzan korapilo guztiak askatuta. Gaur iluntzean 150 astigartar inguru igoko dira Foru plazako oholtza haundira, azken hilabeteetan zehar landutakoa herritarren aurrean aurkeztera. 

Astigar elkartearen 50. urteurrena izango da preludioaren oinarria. Sortu zenetik gaur egun arte bizitakoa aletuko dute sei ataletan bereizita, eta bakoitzean herriko eragile eta kulturgile ezberdinek hartuko dute parte. Ondorengo sei ataletan bereizi dute gaurko emanaldia: Astigarraga herriaren aldarrikapena; Astigarragan euskaraz; Hitzen indarra, aldizkaria; Herriaren berreskuraketa; Aisialdi garaia; eta Belaunaldien arteko transmisioa. 

Pasa den astean egindako dokumentalaren aurkezpenean argi geratu zen Astigar elkarteak herrian izan duen eta duen eragina. Pertsona ugarik hartu dute parte Astigarrek antolatutako jardueretan, eta horixe islatuko da gaurkoan. 

Gaueko 22:30etan hasiko da emanaldia. 

Beste zenbait jarduera izango dira gaurko egunez

Festa giroa pixkanaka iristen ari da Astigarragara ere. Santioak ate joka dauden honetan, preludioa ez da eguneko jarduera bakarra izango. Goizetik hasi eta iluntzera arte non gozatua izango dute astigartarrek: 11:00etan 11 eta 17 urte bitartekoen pala eta esku pelota txapelketa jokatuko dute Txomiñenen, eta arratsaldean Funcional Hybrid saioa, Pala Txapelketa nagusiko finala eta sardina jatea izango dira.

Bihar eta etzi ere kirolarekin lotutako zenbait ekintza izango dira herrian.