«Urrats garrantzitsua» eman zuen astelehenean Astigarragak. Hitz horiekin definitu du Udalak Eusko Jaurlaritzarekin eta Adifekin sinatutako akordioa; «Euskal Trenbide Sarearen bidez Astigarragako tren geltoki berria eraikitzeko kudeaketa gomendioa eta trenbide azpiegitura berria Astigarragarekin lotuko duen pasabidea finantzatzeko hitzarmena», hain zuzen.
Xabier Urdangarin alkateak egin zien harrera Eusko Jaurlaritzako eta Adifeko ordezkariei, eta Susana García Chueca Mugikortasun Iraunkorreko sailburuak eta Pedro Marco Adifeko presidenteak irudikatu eta sinatu zuten erakundeen arteko hitzarmena.
15 milioi euroko inbertsioa
Geltoki berria eta pasabidea eraikitzeko 15 milioi euroko inbertsioa egin beharko da. Geltokiaren eraikuntza Adifek ordainduko du, eta pasabidearen ordainketa Eusko Jaurlaritzarekin egingo du erdibana. Astigarragako Udalaren esku geratuko da pasabidea eraikitzeko behar diren lurzoruak jartzea eta mantentze lanak egitea.
Dokumentazio guztia martxan dago jada, eta Euskal Trenbide Sareak ekainean atera ditu lizitaziora eraikina egiteko obrak. Gauzak horrela, aurreikuspena da obrak aurten martxan jartzea.
Astigarragako Udala pozik azaldu da akordioarekin
Hitzarmena sinatzearekin batera, akordioaren balorazioa ere egin du Astigarragako Udalak. Herritarren mugikortasunerako «urrats garrantzitsua» dela nabarmendu du, eta horregatik izan duela «lehentasun osoa» legegintzaldi honetan: «Astigarragako garraio publikoa oso mugatua da, eta aldiriko tren geltokia martxan jartzean, herritarrentzat asko zabalduko da hainbat herritarako konexioa, eta mugikortasun jasangarria sustatuko da».