Gaurtik, maiatzaren 28ra ospatuko da Astigarragako Cimasub zikloaren 1go edizioa. Itsaspeko zinema proiekzioak, argazki eraskusketa, txikizikloa eta adinzikloa eskainiko dira zikloaren baitan. Nazioarteko Itsaspeko Zinema Zikloaren helburua itsas hondoa ezagutaraztea eta harenganako maitasuna eta errespetua transmititzea da. Horretarako, urpekaritza erabiltzen du kirol, urpeko irudia teknologia, zinema eta argazkilaritza arte eta kultura, eta itsasoarekiko maitasuna bandera gisa.
Aurtengo leloa Irudi bakoitza, konpromiso bat. Begirada bakoitza, aukera bat da. Nazioarteko Itsaspeko Zinema Zikloak (Cimasub), ikusleak ozeanoaren sakonera eramango dituen jardueraz beteriko programarekin dator.
Aurten, zinema-proiekzioen aukeraketa esklusiboa, itsas bizitza eta paisaiak ospatzen dituen argazki erakusketa, Itsaspeko Txikiziklo ezaguna eta adinekoentzako Itsaspeko Adinziklo programa izango dira jaialdian.
Jaialdiaren aurkezpenean izan ziren Marian Oca, Aldundiko Ingurumen saileko zuzendaria, Lurdes Arza eta David Sanchez, Cimasubetik, eta Naroa del Orden, Udaleko zinegotzia. Aldundiko ordezkariak nabarmendu zuenez, beharrezkoa da itsasoek eta ozeanoek duten garrantzia nabarmentzea, «funtsezkoak klima-aldaketaren egungo egoeraren aurrean». Horretarako, Cimasuben bidez iristen diren mezuak azpimarratu zituzten, hondakin tonak biltegiratzean itsasoak eta ozeanoak kontserbatzearen inguruan.
Itsaspeko Zinema gaur, maiatzaren 21ean eta 28an; 19:00etan, Erriberan
Hiru egunetan zehar, itsas munduaren hainbat alderdi aztertuko dira film laburren eta dokumentalen bidez, Erriberan, 19:00etan. Lehenengo saioa itsas biodibertsitateari eta espezieen eta ingurunearen arteko harremanei buruzkoa izango da.
Bigarrena kontserbazioaz eta jasangarritasunaz arituko da, klima aldaketa eta kutsadura bezalako gaiak jorratuz. Azkenik, azken saioak itsasoari lotutako giza eta kultur istorioak nabarmenduko ditu.
Argazki erakusketa ere gaur jarriko da martxan maiatzaren 28ra arte; Erribera kulturgunean. Itsas espezie paregabeak eta urpeko paisaiak erakutsiko ditu, ozeanoetako txoko harrigarrienetara eramango gaituztenak.
Itsaspeko Txikizikloa eta Itsaspeko Adinzikloa
Itsaspeko Txikizikloa eta Itsaspeko Adinzikloa ere izango dira. Itsaspeko Txikizikloa Astigarragako Herri Eskolako ikasleentzat; maiatzaren 19an, 10:00etan, Erribera kulturgunean antolatu da. Hezkuntza-ziklo hau Lehen Hezkuntzako ikasleei zuzenduta dago, eta helburua da itsas biodibertsitatea ezagutzea eta ozeanoak babestearen garrantziaz ikastea, proiekzioen eta hitzaldien bidez. David Sánchezek azpimarratu zuen bezala, «oso garrantzitsuak iruditzen zaizkigu saioak, haien ikuspegia funtsezkoa baita etorkizunari begira». Goizeko hamarretan lehen hezkuntzako ikasleak joango dira Erriberara
Itsaspeko Adinzikloa maiatzaren 21ean izango da, 11:00etan, Astigarragako Eguneko Zentroan. Cimasubek Astigarragako eguneko zentroa bisitatuko du bertan bizi direnei eta haien familiei itsas hondoek gordetzen dituzten edertasun eta sekretu guztiak eramateko.
Itsas bizitza eta aurre egin beharreko ingurumen erronkak hobeto esploratzeko eta ulertzeko aukera paregabea izango da ziklo honetan eskaintzen diren jardueretan parte hartzea.
Gero eta herri gehiagotara ari da zabaltzen
Zikloa pixkanaka gero eta udalerri gehiagotara iristen ari da, eta, egia esan, oso modu garrantzitsuan hazi da azken 3 urteetan. «Foru Aldundiaren laguntzari esker, urtero hiru udalerri berritara iristen ari gara, orain Astigarragaren kasuan bezala», adierazi zuen Cimasubeko zuzendari David Sanchezek. «Gizakiak itsaso eta ozeanoetan duen eragina ere erakutsiko da», adierazi zuen Sanchezek.
Cimasubek urte asko daramatza Gipuzkoako egutegian finkatuta eta dagoeneko 30 udalerri baino gehiagotara iristen da bere jardunaldien antolaketarekin.
Itsaspeko zinemaldirik luzeena bihurtu da
Nazioarteko Itsaspeko Zinema Zikloa 1975ean jaio zen, Real Sociedad Itsaspeko Elkartearen eskutik. Urpekari talde hori itsasoak eta urpeko irudiak maite zuten. Oso formatu erakargarria erabiliz, zinema eta argazkilaritza, alegia, gure ozeanoek ezkutatzen duten edertasun eta biodibertsitate guztia erakusten du eta giza portaeraren eta jarreraren ondorioz duten egoera larria erakusten du.
Gaur egun, 48 edizioren ondoren, erakunde eta entitate babesle eta laguntzaileen babesari esker, Cimasub planeta osoko itsaspeko zinemaldirik luzeena bihurtu da, eta mundu mailan erreferente. Hori dela eta, aukera paregabea da urpeko irudiaren profesional onenen argazkiez, film laburrez eta dokumentalez gozatzeko, bai kalitateari eta edertasunari dagokienez, bai sentsibilizazioari eta itsasoko ingurumen-hezkuntzari dagokienez.