Emakumeon Etxeak zenbait hausnarketa saio egin zituen 2024ko udazkenean, batik bat zehazteko espazioaren beraren nortasuna, erronkak eta helburuak. Saio horietatik hainbat ondorio nagusi atera dituzte, eta horiek publiko egin nahi izan dituzte.
Astigarragako Emakumeon Etxea herritarren zerbitzura dagoen egitasmoa da, Udalaren eta Emakumeon Etxearen artean kudeatutakoa, eta Astigarraga «berdinzale eta justuagoa» eraikitzeko bidean eragin nahi du. Bestalde, Udalak gogorarazi du «emakumeek hausnartzeko, formatzeko, ikasteko, elkar entzuteko eta ezagutzeko espazioa» dela.
Hiru urteko ibilbidea osatu ostean, aurrera begirako erronkak eta horiei heltzeko egin beharreko ekintzak zehaztu dituzte, zenbait kide eta bazkideren artean.
Hiru galdera nagusi mahaigaineratu zituzten hausnarketa saio horietan, hasieratik: Emakumeon Etxea zertarako? Norentzat? Eta norekin egin nahi dugu lan? Galdera hauek sakon hausnartu eta ongi definitu ostean, lau erronka nagusi zehaztu dituzte. Alde batetik, komunitatea indartzeko erronka dute: Emakumeon Etxeko baliabideak erabiltzea sarea sortzeko, bazkideen aktibazioa eta komunitateko lana sustatzea, eta baita herriko elkarteekin elkarlana bultzatzea ere. Horrekin batera, espazioa emakumeentzako erreferentziazko gune bihurtzea ere bada erronketako bat; hau da, espazioak emakume gehiagorengana iristeko bideak sortzea.
Beste erronka bat, formakuntza feministan sakontzea litzateke, komunitate feminista indartzeko, kontzientzia feminista zabaltzeko, indarkeria sexistari erantzuna emateko eta, orokorrean, prestakuntza feministan sakontzeko.
Eta azkenik, Emakumeon Etxea herrira hurbiltzeko erronka ere zehaztu dute. Horretarako, espazioa erakargarriagoa egin nahi dute, jendeak espazioarekiko dituen aurreiritziekin amaitu, eta espazioaren zabalkundea haunditu.