Astigartarren arteko derbia irabazita, promozio mailako Buruz Buruko Txapelketak ligaxkan arituko da Ekain Lizeaga. Aurreikuspen guztiak hautsi zituen larunbatean atzelariak, Exposito herrikideari 22-21 irabazita.
Are harrigarriagoa izan zen garaipena partiduaren bilakaera ikusita. Izan ere, lehenengo zatian Exposito nagusitu zen jokoaren fase guztietan. Aurrelariek erosoago jokatu ohi dute banaka, eta 15-2 irabazten hasi zen Aspeko pelotaria. Alabaina, susperraldi ikaragarria izan zuen Lizeagak; pixkanaka tartea jaten joan zen Expositori, eta presio hori baliatuta 22ra iristeko aukera izan zuen. Partidu gorabeheratsua izan zen orokorrean, eta dena emanda bukatu zuten bi pelotariek.
Orain beste hiru partidu jokatzeko aukera izango du Lizeagak, talde oso gogorrean. Egigurenekin, Bakaikoarekin eta Aldaberekin lehiatu beharko du fase berrian. Lehenengo partidua ostiral honetan bertan jokatuko du, Gasteizko Ogeta pelotalekuan, Joanes Bakaikoaren aurka.