Kronikaren 25garren urteurreneko bertso jaialdia etzi izango da, 19:00etan, Astigarragako Erribera kulturgunean. Agin Laburu, Andoni Rekondo, Maialen Lujanbio, Unai Agirre eta Jexux Mari Irazu bertsolariak arituko dira, berezia eta indartsua izatea espero den punta-puntako saioan. Gai-jartzaile lanetan, gainera, Aritz Zerain izango da.
Hortaz, saioan hartuko dute parte Kronikaren aurreneko lantaldeko hiru kideek, Agirrek, Zerainek eta Irazuk; eta baita gaur egun Kronikan kazetari den Rekondok ere. Maialen Lujanbio txapeldun haundia eta Agin Laburu bertsolari astigartar bikaina gehituta saio ezin hobea prestatu du Kronikak. Bertsotan jarriko dute dantzan Urumea bailarako egunerokotasuna, eta azaleratuko dituzte Kronikaren inguruko hamaika kontu, anekdota eta xelebrekeria.
Sarrerak salgai daude Kronikan bertan eta Ikatza tabernan
Bertso saiorako sarrerak salgai daude Kronikaren bulegoan bertan (Larramendi 11 behea, Hernani) eta Astigarragako Ikatza tabernan, 10 euroan.
San Joan egunaren bezperan beteko ditu Kronikak 25 urte, eta urteurren borobila ospatzeko hainbat ekintza izango dira urte osoan zehar. Otsailaren 13an izan ziren aurrenekoak, Hernaniko Biteri kultur etxean: Kronikaren ibilbideari errepasoa egiteko mahai-ingurua eta erakusketa. Bertso jaialdia da hurrengoa zita, eta ez da azkena izango.