Astigarragako Udalak energia komunitate bat sortu nahi du herritarrekin batera. Astigarragan komunitate energetikoa errealitate bilakatzeko, Gipuzkoako Eraldaketa Energetikorako Bulegoarekin batera, Astigarragako Udalak, 3 saio antolatu ditu. Lehen saioa etzi ostegunean, apirilaren 3an, Udaletxeko areto nagusian izango da arratsaldeko 18:00etan.
Energia komunitateak energia burujabetzaranzko tresna ezinbestekoak dira, energiaren autokontsumoa baitute oinarri eta etxe, enpresa zein tokiko entitateez osatutako irabazi asmorik gabeko kolektibo txikiak baitira. Gainera, komunitate energetikoak modu boluntarioan, parte-hartzailean eta autonomoan energia berriztagarria ekoitzi, kontsumitu eta kudeatzeko aukera ematen dute.
Komunitateko kideak, besteak beste, energia burujabetzaranzko eragile izatera pasatzen dira; energia berdea, 0 kilometrokoa, 100% berriztagarria eta deskarbonizatua kontsumitu ahalko dute eta faktura elektrikoan %25-%30eko aurrezpena lor dezakete.
Saio honen helburua energia komunitateari buruzko informazioa partekatu eta astigartarren artean energia komunitatea sortzeko taldea lortzea litzateke, behin 3 saio hauek amaituta, komunitate energetikoaren sorrerari ekingo litzaioke, Astigarragako Udalaren laguntza eta babesarekin.
Horregatik guztiagatik, «Astigarragarentzat estrategikoa dela sinetsita, Udalak herritar guztiei dei egin nahi die batzarretan parte-hartzera».