Aurten ere kultur astea antolatu du Nabarralde elkarteak, Astigarragako Udalaren babesarekin. Oraingoan, Nafarroako sorgin ehiza gaiari helduko diote, eta bihartik apirilaren 5era luzatuko da.
'Sorgin ehiza Pirinioetan' erakusketa irekiko da bihar, Erribera kulturgunean, Iñigo Larramendiren hitzartzearekin batera. Arratsaldeko 19:30etan hasiko da hitzaldia, eta garai hartako jazarpenetatik 500 urte beteko diren honetan, «memoria, egia, erreparazioa eta erreduintzea, genero ikuspegi batetik» aztertu nahi izango dute bertan. Apirilaren 5era bitarte izango da ikusgai erakusketa, doan.
Apirilaren 5ean, berriz, jardunaldiak ospatuko dituzte, eta goiz osoko egitaraua antolatu du Nabarraldek goizeko 9:15etatik eguerdiko 13:30ak bitarte. Goizeko 09:30etan hasiko da egitaraua, harrera, akreditazioak eta materialaren banaketa egingo dira lehenbizi, eta ondoren jardunaldiei hasiera emango zaie, Aingeru Gorrotxategi musikariarekin batera. Goizean zehar, Asisko Urmenetak hitzaldia eskainiko du: Euskal emakumeak sutan, goizeko 10:00etan hasita. Ondoren, Koro Irazoki Nafarroako sorginkeri prozesuez arituko da, 10:45tan hasita. Eta, atsedenaldia baina lehen, 11:15etan hasita, Kike Fz de Pinedok Arabako ekialdeko Sorgin-ehiza izango du hizpide. Atsedenaldia eta kafea izango dira tartean. 12:15etan, atsedenaldiaren ondoren, Las brujas vascas; entre la fantasía, la tradición y la ley de vagos y maleantes mahai-inguruarekin emango zaio amaiera jardunaldiari. Mahai-inguruko parte-hartzaileak Iñaki Idigoras, Isa Otero eta Mari Carmen Basterretxea izango dira.
Egitarau osoa doan izango da, eta euskera eta gaztelania tartekatuko dituzte. Hala ere, jardunaldietan parte hartzeko ezinbestekoa da izen-ematea, eta www.nabarralde.eus webgunean egin daiteke.