Alokairu gastuak ordaintzeko dirulaguntza deialdia ireki berri du Astigarragako Udalak. Etxebizitza politikan eragiteko helburuarekin, 29 neurriz osatutako planaren barruan doaz laguntza hauek, eta gazteei zuzendutako deialdia da. 18 eta 35 urte bitarteko astigartarrek egin dezakete laguntzaren eskaera, eta apirilaren 10ean itxiko da epea.
Laguntza hau jaso ahal izateko, beharrezkoa da 2024an etxebizitza bat alokatu izana eta beste erakunde batzuek ematen dituzten laguntzak ez jasotzea. Astigarragako Udalak 850 eurotik beherako hileko alokairuak ordaindu behar dituztenei eskainiko die laguntza. Bakoitzak jasoko duen kopurua diru sarreren arabera finkatuko dute, 300 euroko gehiengoarekin. Eskaerak telematikoki (astigarraga.eus) edota udaletxeko erregistroan egin daitezke.
Astigarragako Udaletik jakinarazi dute datozen urteetan dirulaguntzen deialdi honek «ildo gehiago» izango dituela, beste adin tarteak eta familia motak integratzeko.