Herritarren eta ostalarien laguntzarekin diseinatutako terrazen ordenantzak urte bat darama indarrean Astigarragan. Iazko urtarriletik kanpaina ugari jarri ditu martxan Udalak, terrazak arautzen dituen ordenantza eta zaratari buruzko ordenantza betetzen diren ala ez jakiteko.
Urtebete igaro den honetan, balorazioa argitaratu du Astigarragako Udalak. «Zaratari dagokionez, orotara 8 espediente zabaldu ditugu, batzuk neurgailua itzalita edukitzeagatik, beste batzuk neurgailuko muga gainditzeagatik eta beste batzuk zarataren ordenantzako beste neurri batzuk ez betetzeagatik», azaldu dute. 8 espediente horietatik 5 amaituta daude, eta gainontzeko hirurak amaitzeke.
Lur publikoa okupatzeari buruzko ordenantza ez betetzeagatik, berriz, 36 espediente ireki behar izan ditu: «36 espedienteetatik 24 ostalaritza establezimenduari dagozkienak baino mahai edo aulki gehiago jartzeagatik izan dira, horietatik 9ri isuna jarri zaie».
Auzitegietan arrazoia eman diote Udalari
Irakurketan bertan kasu bat bereizi nahi izan du Astigarragako Udalak. «Establezimendu bateko jabeak Udalari leporatu dio behin eta berriz bere eskubideak urratzea eta erabakiak modu arbitrarioan hartzea».
Jakinarazi dutenez, Donostiako Administrazioarekiko Auzien 3. aretoak ebatzi du «Udalak erabaki guztiak egoki eta ordenantzaren arabera hartu dituela».