Urtea borobiltzeko plana proposatu die Astiko Elkarteak astigartarrei. Konektatu komertzio txikiarekin kanpainari errematea jartzeko, festa egingo du gaur herriko merkatarien, ostalarien eta zerbitzuen elkarteak, Emakumeon Plazan. Arratsaldeko 17:00etan emango zaio hasiera arratsaldeari: escape room ibiltaria egingo dute herriko zenbait komertziotan barrena.
Astigartar orok hartu dezake parte jolasean, baina 16 urtetik beherakoek, heldu batek lagunduta joan beharko dute. Parte hartzeko, 3-5 lagunez osatutako taldeek aldez aurretik eman beharko dute izena, helbide honetan: goo.su/iOnIaKH.
Talde bakoitzak 45 minutuko zirkuitua egingo du, eta arratsaldeko 20:00ak arte arituko dira taldeak herriko establezimenduetan barrena probak egiten. Talde guztiek bukatzen dutenean, sariak banatuko dituzte Emakumeon Plazan.
18:00etan festa nagusia, Emakumeon Plazan
Bitartean, Emakumeon Plazan izango da festa nagusia, DJ Mikeltxik girotuta. Arratsaldeko 18:00etan, Olentzerori eta Mari Domingiri gutuna idatzi dioten haur eta gaztetxoen artean, hiru produktu-sorta zozketatuko dira. 19:00ak arte, Konektatu komertzio txikiarekin kanpainako kromorik onena aukeratu ahal izango dute herritarrek, eta haien artean ere opariak banatuko dituzte.
Eta bukatzeko, escape roomeko sari-banaketaren ostean, Astiko elkarteak pintxoak banatuko ditu bertaratutakoen artean. Bada zer ikusi eta zertan parte hartu, gaurkoan.