Urtea borobiltzeko plana proposatu die Astiko Elkarteak astigartarrei. Konektatu komertzio txikiarekin kanpaina borobiltzeko, festa egingo du etzi ostiralean, herriko merkatarien, ostalarien eta zerbitzuen elkarteak Emakumeen Plazan. Arratsaldeko 17:00etan emango zaio hasiera arratsaldeari: escape room ibiltaria egingo da herriko zenbait komertziotatik.
Astigartar orok hartu dezake parte jolasean, baina 16 urtetik beherakoak heldu batek lagunduta. Horretarako, 3-5 lagunez osatutako taldeek aurrez izena eman beharko dute,
esteka honetan: https://goo.su/iOnIaKH.
Talde bakoitzak 45 minutuko zirkuitua egingo du, eta orotara, arratsaldeko 20:00ak arte arituko dira taldeak herriko establezimenduetatik probak egiten. Talde guztiek bukatzen dutenean, sariak banatuko dira Emakumeen Plazan.
Emakumeen Plazan festa
nagusia 18:00etan hasita
Bitartean, Emakumeen Plazan izango da festa nagusia, DJ Mikeltxik girotuta. Arratsaldeko 18:00etan, Olentzero eta Mari Domingiri gutuna idatzi dioten gaztetxoen artean hiru produktu-sorta zozketatuko dira. 19:00ak arte, Konektatu komertzio txikiarekin kanpainako kromorik onena aukeratu ahal izango dute herritarrek, eta haien artean ere opariak banatuko dira.
Eta bukatzeko, escape roomeko sari-banaketaren ostean, Astiko elkarteak pintxoak banatuko ditu.