Datorren ostegunean ekingo diote Astigarragan Mintzalagun egitasmoari. Ikasturtea ondo hasteko festa txiki bat antolatu du AEK-k Erribera Kulturguneko atarian: 'Kaixo, Mintzalagun'.
Arratsaldeko 18:00etan jarri dute hitzordua, eta bertan elkartuko dira urtean zehar programa honetan parte hartuko duten pertsonak. Mintzalagunek elkar ezagutzeko tartea izango dute Erriberan, eta oraindik zalantzan dauden horiek ere parte hartu ahal izango dute. «Euskaraz aritzeko gune erosoa da egitasmoa bera, bai euskara ikasten ari direnentzat, bai dagoeneko badakitenentzat».
Aurkezpenarekin eta hizketalditxoarekin batera, Astigarragako Norberto Almandoz Musika Eskolako ikasleek kontzertu txiki bat eskainiko dute. Gainera, merienda txiki bat ere prestatuko dute AEK-ko kideek hitzordua goxatzeko.