Sagardoak eta sagardotegiek azken 200 urteetan izan duten bilakaera gertutik ezagutzeko aukera dago Astigarragan. Urriaren 3an jarri zuten Erriberako erakusketa gelan 'A la yuklak, golpian bat!' erakusketa, eta urriaren 18ra arte izango da bisitatzeko aukera.
Erakusketak ibilaldi bat egitera gonbidatzen du bisitaria, garai eta testuinguru bakoitzean sagardoak izan duen garrantzia nabarmenduta: «Edariaz gain, sagardotegia elkartzeko, ospatzeko eta aisialdirako gunea izan da, non bolo jokoek, tokak zein bertsolariek giro paregabea sortzen zuten».
1880an, esaterako, aro berri bat hasi zen sagardotegientzat: «Sagarraren laborantza eta sagardoaren ekoizpena kritikoki nahiz zientifikoki aztertu ziren penintsulako zein atzerriko merkatuan hobetzeko eta lehiakor bihurtzeko». Hala ere, garai guztiak ez dira oparoak izan sagardogileentzat, diktadurak eragindako kalteagatik, besteak beste. Gutxigorabehera, 1980 inguruan hasi zen Gipuzkoako sagardogintza suspertzen, eta lan haundia eginda iritsi da sektorea egun bizi duen egoerara.
Sagardoetxeak antolatutako erakusketa hau prestatzeko dokumentazio lan haundia egin behar izan dute aurretik. Ikerketa historikoa egiteaz Lourdes Odriozola historialari eta dokumentalista arduratu da, eta ilustrazioak Jokin Mitxelenak egin ditu.