Azkeneko urteotan, Astigarragako Udalak Sagardoetxearen esperientzia oparitu ohi die etorri berriei, ongietorria emateko. Ekimenak arrakasta izan duenez, aurten ere errepikatzea erabaki da. Erroldatu berriei, hau da, 2023ko irailaren 1etik 2024ko abuztuaren 31era bitartean erroldatu direnei, bi esperientzia ezberdin eskainiko zaizkie.
Batetik, familiei zuzendutakoa izango da Sagar Uzta Esperientzia. Familian eta etxeko txikiekin egiteko esperientzia da. Bi ordu eta erdiko iraupena du eta euskeraz izaten da. Irailaren 29an, igandean, izango da, 10:00etan.
Bestetik, helduei zuzendutakoa Sagardoetxeko Esperientzia: bakarrik edo lagunartean egiteko, bisita gidatua Sagardoetxera eta dastatze berezia. Euskeraz eta gaztelaniaz izaten dira bisitak. Urriak 5ean izango da, larunbatean, 12:00etan edo 18:00etan.
Izena eman behar da, eta gaurkoa da horretarako azkeneko eguna
Esperientzietan parte hartzeko izena eman behar da, eta gaurkoa izango da azkeneko eguna. Izena emateko, elkarbizitza@astigarraga.eus helbidera idatzi daiteke, edo telefono hauetara deituta: 943 50 57 01 edo 638 206 586.
'A la yuklak, golpian bat' erakusketa, urriaren 3tik aurrera
Azkenik, Sagardoetxea Museoak antolatuta, XIX. mende amaieratik gaur egunera arteko sagardotegietako aisialdiari buruzko A la yuklak, golpian bat erakusketa ikusgai egongo da Erribera Kulturgunean, urriaren 3tik aurrera.
Hala, erakusketaren bisita gidatuan parte hartzeko aukera eskainiko zaie erroldatu berriei. Bisita gidatuak izango dira urriaren 10ean, goizeko 11:00etan eta arratsaldeko 18:00etan.