Iristear dira Santiagomendiko jaietako egun haundiak. Gaur gauean hasiko dira giroa berotzen, eta bihar eta etzi egun osoko festaz gozatzeko aukera izango da ermitaren inguruan.
Gaur Mus Txapelketa jokatuko dute bertan, gaueko 22:00etan hasita. Parte hartu nahi duten bikoteek iluntzeko 21:30etatik aurrera eman ahalko dute izena. 20 euro ordaindu beharko ditu bikote bakoitzak.
Hala ere, bihar eta etzi hasiko da benetako festa giroa. Goizeko 10:00etan hasiko da diana, eta askoren eguna goizaldeko ordu txikietara arte luzatuko da ziurrenik. Ohiko egitaraua antolatu dute aurtengo festetarako, eta jende ugari elkartzea espero da. Bihar eguerdian tortilla eta sagardo lehiaketa egingo dute auzotarren artean, eta asto dema izango da ondoren.
Larrarte sagardotegiko bazkari herrikoian indarrak hartuta, herri kirol saioa egingo dute arratsaldean auzoko eta bailarako gazteek. Bertan arituko dira Ander Altuna, Zihara Irazustabarrena, Julen Gabirondo, Iraide Martin, Jokin 'Basozabal', Olaia Lizeaga, Suharri 'Paolla' eta Irati Merkader.
Eguna amaierara iristean, bapo afaldu eta gero, Astigarragako 3ttu erromeria taldearekin dantzatzeko aukera izango da Santiagomendin.
San Roke eguna ospatuko dute ostiralean
Ostiralean festak jarraipena izango du San Roke eguneko ospakizunarekin. Behin meza bukatuta, Astigar elkarteko dantzariak eta Txirriskla taldeko txistulariak arduratuko dira ingurua girotzeaz. Gero bazkari herrikoi baten bueltan elkartuko dira auzotarrak.
SANTIOMENDIKO JAIAK
GAUR, abuztuak 14
22:00 Mus txapelketa ermitan. Izen ematea 21:30etatik
aurrera, 20 euro bikoteko.
BIHAR, abuztuak 15
10:00 Diana.
11:00 Tortilla eta sagardo lehiaketa auzotarren artean.
12:00 Asto dema.
14:00 Bazkari herrikoia Larrarte sagardotegian.
18:00 Haur txokoa.
18:00 Herri kirolak ermita azpian. Ander Altuna, Zihara Irazustabarrena, Julen Gabirondo, Iraide Martin, Jokin 'Basozabal', Olaia Lizeaga, Suharri 'Paolla' eta Irati Merkader.
19:30 Toka txapelketa.
21:00 Afari herrikoia Donejakue ermitan.
Afalostean 3ttu Astigarragako erromeria taldea.
ETZI, abuztuak 16 - San Roke
11:00 Meza.
12:00 Astigar elkarteko dantzariak eta Txirrisklako txistulariak.
13:00 3ttu taldearen emanaldia.
14:00 Bazkari herrikoia. Txartelak Ikatzan salgai.
17:30 Ken Bat taldearekin dantzaldia.