Uda honetan ere izango da zineaz kalean gozatzeko aukera, Astigarragan. 'Barbie' pelikula jarriko dute etzi, larunbatez, Murgia Jauregiaren kanpoaldean. Gaueko 22:30etan hasiko da saioa, eta doakoa izango da. Euria eginez gero, Kontxa Etxeberria plazara mugituko dute, Erribera kulturgunearen aterpera.
2023ko filma da 'Barbie', Greta Gerwigek zuzendutakoa, eta Margot Robbie eta Ryan Gosling aktoreak dira protagonistak, Barbie eta Ken. Barbielanden, bizitza ezin hobea darama Barbiek; han dena da perfektua, musikaz eta kolorez betetako festekin. Baina bere buruari galderak egiten dizkio, mundu ideal horretan deseroso xamarrak diren gaiekin lotutakoak. Orpoak lurrean jarri, takoirik gabeko zapatak jantzi, eta mundu errealera bidaiatzea erabakiko du.
114 minutuko pelikula da, eta gaztelaniaz jarriko dute.