Egitarau oparoa izango du Lurraldiaren hirugarren edizioak

Indartsu iritsi da Lurraldiaren hirugarren edizioa. Asteazkenean, San Isidro egunez, hasiko dira egitarau oparoko jarduerak, eta igandera arte izango da baserriarekin lotutako ekintzekin gozatzeko aukera. Astigarragako Udalak, Goldeak eta Baratze Elkarteak elkarlanean antolatutako festa da, eta aurkezpen prentsaurrekoan antolatzaileek nabarmendu zutenez, «garrantzi berezia» izango du aurtengoak, baserritarren sektorea bizitzen ari den «egoera txarra» dela eta. 

Xabier Urdangarin alkateak adierazi zuen baserritarren lana «erakustea eta aitortzea» dela Lurraldiaren helburua. Horretarako, Lurraldiko egunak erreferentziazkoak izatea da antolatzaileen nahia. Antton Arka Goldeako kideak gehitu zuen «entzunak izateko beharrean» daudela baserritarrak, eta «jendearekin konektatzea» dela aurtengo beste helburuetako bat. 

San Isidro eguna izango da Lurraldiaren lehenengo mugarria. Urteroko egitarauari jarraipena eman diote, baina idi-deman berritasun bat txertatu dute: Ipiñarrietaren eta Aranbarriren idiak orain arte plazaratu gabekoak izango dira. Goizeko jardueren ondoren, Elione baserriko familiari omenaldia egingo diote. 

Illarrarekin lotutako jarduerak, ostegunetik aurrera

Illarraren pintxo poteak ere jarraipena izango du aurtengo Lurraldian. Astigarragako 14 tabernek hartuko dute parte lehiaketan, eta ostegun arratsaldean illarrarekin egindako pintxoak dastatzeko aukera izango da horietan. 

Aurtengo edizioko azken eguna maiatzaren 19a izango da. Orduan ospatuko dute Illarraren Eguna, eta azoka berezia prestatzeaz gain, herriko baserrietako abereen erakusketa egingo dute Foru plazan. 

Lurraldiak irauten duen bitartean zenbait kultur jarduera ere izango dira Astigarragan.