Otsailaren 2an Astigarragan hildako 36 urteko gizonaren heriotza salatzeko, kontzentrazioa deitu du Buruntzaldeako Kontseilu Sozialistak. 'Poliziaren indarkeriari aurre egin!' lelopean egingo dute elkarretaratzea, arratsaldeko 19:00etan, Joseba Barandiaran plazan.
Hildako gizonaren familiak salatu du bertaratutako ertzainek modu desegokian tratatu ondoren hil zela. Izan ere, delirioak jota zegoen 36 urteko gizona, eta autopsiak bihotzekoak jota hil zela dioen arren, familiak bortxa zantzuak ikusi zituen gorpuan. Kontrara, familiak nabarmendu du Astigarragako Udaltzaingoaren jarrera eredugarria izan zela, ertzainak iritsi aurretik gizona baretzea lortu zutelako.
Gertatutakoa argitzeko, familiak salaketa jarri du Donostiako Instrukzioko 5. Epaitegian.