'Mira Hadi, Eulalia Abaitua andre begietan' izeneko antzezlana eszenaratuko dute etzi arratsaldeko 19:00etan, Erriberan. Bi emakume izango dira eszenan; batetik, Lide Hernando (Liher taldekoa); eta bestetik, María Urcelay. Arte bisualaren eta zuzeneko musikaren bidez, aitzindaria izan den emakume baten bizitza kontatuko dute; Eulalia Abaitua argazkilariarena, hain zuzen.
Aitzindaria eta aparta
Eulalia Abaitua argazkilari aitzindariaren bizitza ez da oso ezaguna. Bilbotik Liverpoolera abiatu eta Ingalaterran aurkitu zuen argazkilaritza. Argazkilari etnografiko aparta izan zen, aitzindari haundia. Bere bizitza kontatuko dute etzi Erriberan, eta bere sorkuntza erakutsiko dute begirada garaikide baten bidez.