Gaur eguerdian hasiko da 2024ko txotx denboraldia. Urteroko legez, gonbidatu berezi bat izango da, sagardoaz gain, eguneko protagonista. Iñigo Etxezarreta, ETS taldeko abeslari gasteiztarra, izango da lehenengo kupela irekitzeko arduraduna.
Eguerdiko 12:00etan Erriberan jarri dute hitzordua Euskal Sagardoa Jatorri Deiturak eta Sagardoaren Lurraldeak. Aurtengo uztari eta denboraldiari buruzko xehetasunak eman ondoren, sagarrondoa landatuko du Etxezarretak kulturgunearen inguruan.
Bertakoak bukatuta, Alorrenea sagardotegira aldatuko da eszenatokia, bertan irekiko baitute aurtengo lehenengo kupela. Eguerdiko 13:45ak aldera izango da hori, gonbidatu bereziak 'Gure sagardo berria!' oihukatzen duen momentuan.
Ondoren, bazkari baten bueltan borobilduko dute ekitaldia Alorreneara bertaratzen diren guztiek.
Izarrez betetako zerrenda
1994 urtean hasi ziren Astigarragako Sagardo Berriaren Eguna antolatzen, eta ordutik Euskal Herriko pertsonaia ezagun ugarik ireki dute denboraldia.
Andoni Egaña bertsolaria izan zen lehenengo gonbidatua, Euskal Herriko aurreneko txapela jantzi berritan. Orduz geroztik, kirolariak, sukaldariak, kulturgileak, musikariak eta askotariko pertsonak igaro dira postu horretatik.
Pandemiak ez zuen katea eten
Pademiako urteetan ere ez zuten geldialdirik egin Sagardo Berriaren Eguneko antolakuntzan. 2021ean ETBko 'A Bocados' saioko aurkezleek, Ander Gonzalez eta Gabriela Uriarte, izan ziren omenduak.
Iazko irekiera bi aktore haundiren eskutik etorri zen. Giro ederra sortu zuten Aitziber Garmendiak eta Jon Plazaolak, txiste eta pasadizoekin. Aurtengoan ere giro ederra espero da.
|
TXOTX IREKIERAKO GONBIDATUAK 1994-2024 ASTIGARRAGA 1994 Andoni Egaña, bertsolaria 1995 Jose Mari Bakero, futbolaria 1996 Javier Clemente, entrenatzailea 1997 Julian Retegi, pelotaria 1998 Miguel Indurain, txirrindularia 1999 Juan Mari Arzak, sukaldaria 2000 Pedro Miguel Etxenike, fisikaria 2001 Joane Somarriba, txirrindularia 2002 Martin Fiz, korrikalaria 2003 Abraham Olano, txirrindularia 2004 Periko, Mikel eta Xabi Alonso, futbolariak 2005 Ainhoa Arteta, sopranoa 2006 Jose Luis Korta, arraunlaria 2007 Juan Mtz. de Irujo, pelotaria 2008 Andoni Luis Aduriz, sukaldaria 2009 Aimar Olaizola, pelotaria 2010 Real Sociedad, futbolariak 2011 Karlos Arguiñano, sukaldaria 2012 Julian Iantzi, aurkezlea 2013 La Oreja de Van Gogh, musikariak 2014 Kalakan, musikariak 2015 Loreak filma, aktoreak 2016 Aritz Aranburu, surflaria 2017 Eneko Atxa, sukaldaria 2018 Alberto Iñurrategi, mendizalea 2019 Olatz Arrieta, kazetaria 2020 Izaro, abeslaria 2021 'A Bocados', telbista saioa 2022 AMAK, musikariak 2023 Aitziber Garmendia eta Jon Plazaola, aktoreak 2024 Iñigo Etxezarreta, abeslaria |