Astigarragako Udalak bat egin du UEMAk abiatu duen Egin nirekin ere euskaraz! euskaldun arrazalizatuen inguruko aurreiritziak gainditzea helburu duen kanpainarekin. Sustraiak beste herrialdeetan izan arren gurean errotu diren hainbat euskaldunen eskaria da kanpaina, hasiera batean gainerako herritarrek euskera ukatzen dietela sumatuta.
Euskerak kolore asko dituela eta azalaren kolorea askotarikoa izan arren herritar horiek guztiak euskaldunak direla gogoratu nahi du kanpainak.
Euskaldunak dira Arlenys, Haider, Aimar, Aya, Nora, Sefora, Miruna, Randy, Ekhi, Manna, Anastasia, Andriy, Zunnurain, Lassana, Abdallah, Alaia, Rayan eta Leen, UEMAk Ibarran aurkeztu zuten Egin nirekin ere euskaraz! kanpainari aurpegia jarri dioten lagunak. Senegalen, Dominikar Errepublikan, Saharan, Pakistanen, Ukrainan, Errusian, Marokon, Ekuadorren eta Euskal Herrian jaio dira, besteak beste. Bizi, berriz, Ondarroan, Leitzan, Ibarran, Zestoan eta Zaldibian bizi dira, baina gainerako udalerri euskaldunetan ere badira beste dozenaka Abdallah, Leen edota Arlenys, zorionez. Urdua, arabiera, mandinga, kitxua, ukrainera, errusiera, gaztelera edota euskera jaso dute etxean.
Euskera, zehazki, lehen hizkuntza da batzuentzat, bigarrena besteentzat, eta baita hirugarrena ere zenbaitentzat.
Hala ere, euskeraz aritzen dira eskolan eta lagunartean. Askotan, ordea, azalaren koloreagatik, aurreiritziengatik edota auskalo zergatik erdaraz hitz egiten diete gainerako herritarrek. Eta ez zaie gustatzen. Euskaldunak direlako. Horregatik, beraiekin ere euskeraz egiteko eskatu nahi izan diete gainerako herritarrei.