Astigarragako Matazak Indarkeria Sexistaren Aurka elkarteak jardunaldiak antolatu ditu seigarren urtez jarraian. Aurtengo edizioan, ingurune birtualetan emakumeek jasaten duten indarkeria aztertuko dute, zenbait adituren laguntzarekin.
Gaur arratsaldean, hasteko, Marta Macho-Stadler matematikari eta dibulgatzaile zientifikoak 'Emakumeak informatikan: genealogiatik arrakaletara' hitzaldia eskainiko du, 18:30etatik 20:30etara, Erriberan.
Bihar, berriz, goiz osoan zehar eskainiko dituzte hitzaldiak, Erriberan bertan. Guztira lau saio antolatu dituzte: 'Ziberfeminismoa, genero indarkeriaren aurkako laguntza sarea', Muria Varelaren eskutik; 'Nanosfera: aktibista feministen aurkako indarkeria sare sozialetan eta zibersegurtasuna', Carolina Gonzálezen eskutik; 'Emakumeen aurkako indarkeriak sare sozialetan eta ligatzeko aplikazioetan', Laura Mañasen eskutik; eta 'Indarkeria algoritmikoak eta adimen artifiziala: aukerak eta desafioak indarkeria matxisten aurkako borrokan', María Lópezen eskutik.
Hitzaldietan parte hartzea doakoa da, baina derrigorrezkoa da aurrez izena ematea. Horretarako, encuentrofeministamadejas@gmail.com helbidera idatzi behar da.
Jardunaldien amaieran, V. Matazak Saria emango dute.