Gaurtik aurrera, salgai daude Astigarragako deskontu bonu orokorrak. Txartel orokorrek %20ko deskontua izango dute, eta herriko 31 establezimendutan erabili ahal izango dira. Horretarako, www.astiko.eus webgunearen bitartez erosi behar dira bonuak; azaroaren 30era arte mantenduko dute zabalik eskuratzeko epea, lehenago bukatzen ez diren bitartean. Herritarrengandik erantzun ona jaso ohi du Astikok deskontu bonuen salmentan, eta Astigarragan kontsumitzen duten pertsonei laguntzea da elkartearen nahietako bat: «Herrian kontsumitzen duten herritarrak saritu nahi ditugu, beraien erosketetan deskontuak eskainiz».
Bonuak 2024ko otsailaren 29ra arte erabili ahal izango dira, eta lau motatakoak erosteko aukera dute astigartarrek: 10, 20, 50 eta 100 eurokoak, hain zuzen ere. Astiko elkartetik nabarmendu dute, seigarren edizio honetako helburua dela «herrian bertan kontsumitzeak duen garrantziaz» kontzientziatzea: «Herriko merkataritzan eta ostalaritzan kontsumitzeak, herriaren ekonomian, herriko enpleguaren sorkuntzan zein herri bizitzaren dinamizazioan duen eraginagatik».
Eskaintza berezia aurten, herriko gazteentzat
Deskontu bonu orokorrez gain, gazteentzako deskontu bonuak eskuratzeko aukera ere badago. Urriaren 6an jarri zituzten salgai txartel berezi horiek, 16 eta 29 urte bitarteko herritarrentzat. Horiek ere, Astiko elkartearen webgunean erosi behar dira, ondoren establezimenduetan erabili ahal izateko. Epeak berberak dira, kasu honetan ere.